Utoqqarmiut Kangerluarsunnguanni erngup nukinganik innaallagissiorfiup allilerneqarnissaanut atatillugu suliassap sumiiffissaanut aqqusinniorneq aallartillualereerpoq.
Piffissami matumani NunaGreenip sanaartornermik suliaqarnerit umiarsualiviup tungaani innaallagissiorfimmit pioreersumit tasersuarmut, innaallagissiorfissallu nutaap sumiiffissaanut sanaartornermi aqqutissamik aqqusinniornerit aallartereerpai. Suliassaq entreprenørit GNC-meersut suliarivaat.
Isumannaallisaaneq pillugu sumiiffik matoqqatinneqarallarpoq
Isumannaallisaaneq pillugu sumiiffik tamarmi – talittarfik, aqquserngit, sanaartorfiillu nalunaarsukkat – sanaartortoqarnerata nalaani tamanut matoqqatinneqassapput. Tamanna pisuttunut, angallattunut, piniartunut sumiiffimmilu atuisunut tamanut atuuppoq.
Sanaartornermi qaartiterinerit oqimaatsunillu assartuinerit ingerlanneqarput, taamaasilluni killilersuinerit pisariaqarlutik. Sumiiffiit ersarissunik allagartalerneqassapput NunaGreenillu mianersoqqussutit ataqqineqarnissaat inassutigaa.
”Nalunngilarput Utoqqarmiut Kangerluarsunnguat sunngiffimmi sammisassaqarfittut aallaaniarfittullu pingaartinneqartoq, paasisinnaalluarparpullu utaqqiisaasumik killiliussat akornutaasinnaammata. Isumannaallisaanerli inunnut tamanut, sanaartorfimmilu sulisorpassuarnut pingaaruteqarmat taakku salliutinneqarput,” NunaGreen A/S-imi pisortaq, Aviaaja Karlshøj Knudsen, oqarpoq.
Ukiorpassuarni qulikkaani sarfaq mingutsitsinngitsoq
Utoqqarmiut Kangerluarsunnguanni erngup nukinganik innaallagissiorfiup allilerneqarnissaa maannamut Kalaallit Nunaanni erngup nukinganik suliassat annersaraat. Suliaq naammassippat Nuummi innaallagissamik atuinerup annertusiartuinnarnerani ukiorpassuarni qulikkaani sarfamik mingutsitsinngitsumik atuisinnaanissamut qulakkeerinnissaaq, saniatigullu mingutsitsinngitsumut ikaarsaariartornermut ineriartortitseqataassalluni.
Nunap assingani umiarsualivik aqqusinniorfiillu eqqai nalunaarsoqqarput.
Annertunerusumik paasisaqarniaruit attaveqarfigiuk:
NunaGreen A/S
Indaleeqqap Aqq. 12, 3900 Nuuk
nunagreen@nunagreen.gl
+299 36 36 50
