Kalaallit Nunaanni erngup nukinganik suliassat annersaannut atuinissamut akuersissut Naalakkersuisut akueraat.
Utoqqarmiut Kangerluarsunnguanni erngup nukinganik innaallagissiorfiup allilerneqarnissaanut – maannamut Kalaallit Nunaanni erngup nukinganik suliassat annersaannut – atuinissamut akuersissut Naalakkersuisut tunniuppaat. Allilerinermi Nuummi innaallagiamik atuinerup annertusiartuinnarnera naammassineqassaaq aammalu aalajaatsumik ataavartumillu nukissiamik atuilluni illoqarfiup mingutsitsinngitsumik ineriartornissaa siunissamut qulakkiissallugu.
Akuersissummi NunaGreen A/S aamma Nukissiorfiit Utoqqarmiut Kangerluarsunnguanni erngup nukinganik isumalluutinik atuinissamut ukiuni 40-ni aggersuni pisinnaatitaaffeqalerput.
Suliassami ilaatinneqarput nutaamik 16 km-isut takissusilimmik sulluliornissaq, imeqarfimmik pioreersumik tatsimut qaffasinnerusumi inissisimasumut atassusiisussamik, erngup nukinganik innaallagissiorfimmik 76 MW-imik nutaamik sanaartornissaq kiisalu aqqusersuutit 35 km-isut takissusillit, innaallagissiorfinnik marlunnik taakkuninnga ataatsimuulersillugit attaviliisussaq. Suliassat tamakkiisumik inerisarneqareerpat, Nuummi nukissiamik pisariaqartitsineq annertusiartuinnartoq siunissami ukiorpassuarni qulikkaani sarfamik mingutsitsinngitsumik naammassineqarsinnaassaaq.
Kalaallit Nunaata mingutsitsinngitsumut allanngoriartortitsineranut alloriarneq pingaarutilik
"Atuinissamut akuersissut suliassap piviusunngortinneqarnissaanut aalajangiisuulluinnartumik pingaaruteqarpoq aammalu anguniakkat ilaannik pingaarutilimmik malunnartitsilluni. Naalakkersuisut periusissiaanni aammalu nunarsuarmi oqaluuserisassani mingutsitsinngitsumut allanngoriartortitsinerup qitiutinneqarnerani – aammalu uuliamut akigititat nalorninartorsiornerup annertusiartorneranit sunnersimaneqartillugit – periusissani attaveqaasersuutinut suliassap piviusunngortinneqarsinnaanissaa immikkut pingaaruteqarpoq" oqarpoq Aviaaja Karlshøj Knudsen, NunaGreen-imi pisortaaneq.
”Utoqqarmiut Kangerluarsunnguanni erngup nukinganik innaallagissiorfiup allilerneqarnissaa nunatsinni sanaartugassat annersaraat, aammalu inuiaqatigiinnut kalaallinut aammalu mingutsitsinngitsumut allanngoriartortitsinermut pingaaruteqalertussaalluni. Atuinissamut akuersissut suliassap piviusunngortissinnaanissaanut alloriarneruvoq pingaaruteqartoq, taamaattumillu Naalakkersuisut taanna akuerimmassuk nuannaarutigaara” oqarpoq Johan Danielsen, Nukissiorfinni nukissiornermut pisortaq.
NunaGreen suliassami sanatitsisuuvoq, Nukissiorfiit innaallagissiorfiup naammassinerani ingerlanneqarnera tigussallugu. Taamaattumik atuinissamut akuersissut ingerlatseqatigiiffinnut marlunnut taakkununnga ataatsimoorussamik tunniunneqarpoq.
Piareersaanerit ingerlanneqalereerput
Sanaartornermik suliaqarnerit siulliit, suliassap sumiiffianut aqqutissamik aqqusinniorluni, aallartinneqareerput. Tamanna Kalaallit Nunaanni illuliortiternermut sanaartornermullu suliassaqarfimmi suliassaqalersitsissaaq aammalu suliassap immikkoortuinut pisussanut aqqutissiuussissalluni.
Peqatigisaanik nunani tamalaani suliffissuit marluk sanaartugassanut tamakkiisunut akigititassanut isumaqatigiissummut neqeroorummik suliaqarnissaq sulissutigaat. Naggataatigut isumaqatigiissutissap 2025-p naanerani isumaqatigiissutigineqarnissaa naatsorsuutigineqarpoq. Sanaartorluni suliaqarneq 2026-mi aallartissasoq naatsorsuutigineqarpoq, innaallagissiorfik allilerneqartoq 2032-mi ingerlanneqalissalluni.
