Utoqqarmiut Kangerluarsunnguannut piukkunnartussarsiuussinerup iluatsilluartumik aallartereernerani, NunaGreen A/S-ip maannakkut Qeqertarsuup Tunuani erngup nukinganik suliassaq ingerlateqqilerpaa. Ingerlatseqatigiiffiup immikkoortortap nutaap, NunaGreen Construction Disko Bay A/S-ip, immikkut illoqarfinni Aasianni Qasigiannguanilu pilersuinissamut erngup nukinganik innaallagissiorfiliornissamik ukkatarinnittussap, pilersinneqarnera ingerlatseqatigiiffiup ullumi nalunaarutigaa. NunaGreen Construction Disko Bay A/S-ip pilersinneqarnerani, nukissiamik ataavartumik mingutsitsinngitsumik nunatsinni pilersuinerup ineriartortinnissaa pillugu Namminersorlutik Oqartussat aalajangiinerisa piviusunngortinnissaanut alloriartoqaqqippoq.
”NunaGreen Construction Disko Bay A/S-ip pilersinneqarnerani, immikkoortortaq suliassami tassani siunnerfilimmik sunniuteqarluartumillu suliniuteqarnissamik qulakkeerinnissinnaasoq pilersipparput. Erngup nukinganik innaallagissiorfiup Aasianni Qasigiannguanilu pisariaqartitsineq naammassiinnartussaanngilaa, kisianni Kalaallit Nunaata piujuartussamik nukissiornermut allanngoriartortitsinerani anguniakkat killiffiattut pingaaruteqartutut aamma atorneqartussaalluni,” oqarpoq NunaGreen-imi pisortaaneq Aviaaja Karlshøj Knudsen.
Qeqertarsuup Tunuani erngup nukinganik innaallagissiorfissat nunap immikkoortuani sanaartugassat anguniagaqarfiulluarnerpaat ilagilissavaat. Suliassami ilaatinneqarput erngup nukinganik innaallagissiorfimmik nutaamik sananissaq aammalu pilersuinermi aqqusersuutinik 100 kilometerit sinnerlugit takissusilinnik, illoqarfinni marlunni taakkunani nukissiamik aalajaatsumik piujuartussamillu pilersuinermik qulakkeerisussanik, pilersitsineq.
2025-p ingerlanerani VVM-imut nalunaarusiamut tusarniaassutigineqartussatut naatsorsuutigineqartumut, aammalu innuttaasunik ataatsimiititsisoqarneranut atatillugu suliassaq pillugu sukumiisortai allat paasissutissiissutiginissai NunaGreen-ip qilanaaraa.
Suliassap taassumarpiaap ersarissumik ukkatarineqalernissaanut, peqatigisaanillu isumalluutit immikkullu paasisimasallit pitsaanerpaamik atorluarneqarnissaannik qulakkeerinissamut, NunaGreen Construction Disko Bay A/S pilersinneqarpoq. Ingerlatseqatigiiffiup suliassamut siunnersortitut suliassat ukiup nutaap aallartinnerani neqeroortitsiviginiarpai.
”Ingerlatseqatigiiffiup nutaap taassuma atuutilernerani aaqqissuussaanerput nukittorsarsinnaavarput aammalu suliassap iluatsilluartumik ingerlanneqarnissaanut pisariaqartunik piginnaasaqartunik isumalluutinillu peqarnissarput qulakkiissallutigu. Suliassap inerisarluarnissaanut suliaqarnerup ingerlateqqinnissaa aammalu teknikkikkut patajaatsumik piujuartussamillu neqeroortitsinissap piareersarnissaa qilanaaraagut,” nangippoq.
Tassunga atatillugu, pingaarnertut ukkatarineqartoq nunamilu sumiiffinni inissisimaffik takuneqarsinnaatinniarlugu, NunaGreen Construction-ip taaguutaa atuuttoq, NunaGreen Construction Nuuk A/S-nngorlugu allanngorpoq.
