NunaGreen A/S Kalaallit Nunaanni nukissiornissamut periarfissaqarfiit annertoorujussuit atorluarnissaannik suliaqarnermi annertoorujussuarmik alloriaqqippoq. Ingerlatseqatigiiffiup Namminersorlutik Oqartussanit pigineqartup ingerlatseqatigiiffik immikkoortortaq nutaaq, NunaGreen Development A/S, ataavartumik nukissiornerup iluani suliassanik ineriartortitsinermik ingerlatsinermillu ukkatarinnittussaq, 1. januar 2025 pilerseqqammerpaa.
”NunaGreen Development A/S-imi Kalaallit Nunaanni avataanilu mingutsitsinngitsumut allanngoriartortitsinerup siuarsarnissaa pillugu anguniagaqarnerput sukkatsiteqqissinnaavarput. Ingerlatseqatigiiffik suliniutissanik nutaanik pilersitseqataaginnassanngilaq, kisianni aamma nunatsinni nunanilu tamalaani suliaqartuusut suleqatigalugit ineriartortitsinissamik qulakkeerissalluni,” oqarpoq Aviaaja Karlshøj Knudsen, NunaGreen A/S-imi pisortaaneq.
”NunaGreen A/S-imut aamma Kalaallit Nunaat tamakkiisutut isigalugu tamanna kapitalitut nutaatut pissaganartutut isigaarput. NunaGreen Development A/S-ip aaqqiissutissanik nutaanik, siunissami ukiorpassuarni piujuartussamik nukissiornissamik qulakkeerisinnaasunik, nutaaliorluni ineriartortitsinissamut periarfissippaatigut,” nassuiaavoq Aviaaja Karlshøj Knudsen.
Suleqatigiinnermik paasisimasaqarnermillu nukittorsaaneq
Ingerlatseqatigiiffiup nutaap taassuma assigiinngitsunik paasisimasallit pilerilersinnissai aammalu najukkami piginnaasalinnik ineriartortitsinissap ukkatarinissaa, kissaatigaa. NunaGreen-ip attaveqarfigisartagai suleqatigisartagaalu suleqatigalugit NunaGreen Development A/S-ip ataavartumik nukissiornerup iluani suliniutinik ineriartortitsinissaq piviusunngortitsinissarlu sulissutiginiarpai.
Sulisunngortussaq februaarimi aallartereertussaavoq aammalu NunaGreen Development A/S-imi suliassat ineriartortinnissaannut ingerlannissaannullu tapersiissalluni.
NunaGreen Development A/S-ip pilersinneqarnerani piginnittutta, Namminersorlutik Oqartussat, Kalaallit Nunaata pinngortitami pisuussutaasa ataavartumik nukissiornerup ineriartortinneqarnerannut atorluarneqarnissaat pillugu anguniagaqarnerat qanillattorlugu alloriaqqippugut. Siunnerfigineqarpoq nunatsinnut iluaqutaasumik periarfissaqarfiit piviusunngortinnissaat – innuttaasunut piujuartussamik nukissiuutitut aamma tapiiffigineqanngitsumik isumalluutitut aammalu Kalaallit Nunaata isertitaqarfissaatut.
NunaGreen Development, NunaGreen A/S-ip inuiaqatigiinnut iluaqutaasumik Kalaallit Nunaata nukissiornermut isumalluutaasa annertoorujussuit ineriartortinnissaat pillugu siunertaqarneranut, pissusissamisoortumik nangissutaavoq. Ingerlatseqatigiiffiup nutaap taassuma nunaqarfinnut illoqarfinnullu nukissiamik mingutsitsinngitsumik pilersuineq kisiat suliarisussaanngilaa, kisianni aamma nukissiamik ataavartumik avammut nioqquteqarnissamut periarfissanik misissuisussaalluni.
”Aaqqiissutissanik nutaaliorluni piujuartitsiviusumillu ineriartortitsinissamut nunatsinni nunanilu allani suleqatigisartakkatta suleqatiginissaat qilanaaraarput. NunaGreen Development A/S Kalaallit Nunaata siunissaanut aningaasaliineruvoq aammalu suliaqarnerup maannakkut aallartitatta inernerisa takunissaat qilanaaraarput,” naggasiivoq Aviaaja Karlshøj Knudsen.
