Ulloq 1. juni 2024 aallarnerfigalugu Aviaaja Karlshøj Knudsen, NunaGreen A/S-imi pisortaanertut atorfinilluni aallartissaaq. Aviaaja, illussanik titartaasartutut ilinniagaqarluni patajaatsunik tunuliaqutaqartoq, pisortatut inissisimanernit annertuunik misilittagaqarpoq, ilanngullugu Greenland Airports-imi suliniutinut pisortatut aammalu INI A/S-ip siulersuisuini ukiorpassuarni siulittaasup tulliatut.
Aviaajap aqutsinerani NunaGreen-ip attaveqaasersuutinut suliassat pingaaruteqartut ukkatarineqassapput, ilanngullugit Utoqqarmiut Kangerluarsunnguanni erngup nukinganik innaallagissiorfiup allilerneqarnissaa aammalu Qeqertarsuup Tunuani nutaamik erngup nukinganik innaallagissiorfiliornissaq. Suliassat taakkua Kalaallit Nunaata siunissami nukissiamik pilersuineranut inuiaqatigiinnilu ineriartortitsinermut aalajangiisuulluinnartumik pingaaruteqalerput. “Aviaajap sanaartugassanut angisoorujussuarnut annertuumik ilisimasaqarnera aammalu inuiaqatigiinnut kalaallinut annertuumik paasisimasaqarnera, siulersuisut toqqaanerannut aalajangiisuulluinnartumik tunngavigineqarput,” oqarpoq Line Frederiksen, NunaGreen-imi siulersuisuni siulittaasoq.
NunaGreen-ip aamma mingutsitsinngitsumut allanngoriartortitsinerup ingerlannissaa aammalu Kalaallit Nunaanni nukissiamut periarfissaqarfiusut niuerutigineqarsinnaalersinnissaat siunnerfigai. “NunaGreen-ip siuariartorneranut tapersiinissara aammalu suliassatta annertuumik pilersaarutaasut, attaveqaasersuutinik inuiaqatigiinni pisariaqartinneqartunik nukittorsaasussat aammalu Kalaallit Nunaanni piujuartitsiviusumik ineriartortitsinermut tunngavissiisussat, aqunnissaat qilanaaraara,” oqarpoq Aviaaja Karlshøj Knudsen.
Aviaajap sulisussarsiarineqarnera avataaneersoq sulisussarsiornermut allaffeqarfik siuttuusoq suleqatigalugu ingerlanneqarpoq, aammalu NunaGreen suliffeqarfimmut aammalu Kalaallit Nunaannut piffimmi pissanganartumi aqunnissaanut piukkunnarluinnartoq siulersuisut qularutiginngilaat.
